| |
Kirmen Uribe Ondarroan (Bizkaian) jaio zen
1970ean. Gazterik hasi zen musika-taldeentzat letrak idazten.
1987an TU-K taldeak musikatu zituen lehenbizikoak Existentzia
izeneko maketan. 1990 urtean Le blist bilduma kaleratu zuen
Josu Aranbarri marrazkilariarekin batera. Le blist proiektuak
1987 eta 1990 urteen artean sorturiko poemak eta komiki expresionistak
biltzen ziren bertan.
Euskal Filologian lizentziaduna, Literatura gonbaratuzko graduondoko
ikasketak burutu zituen Italian. Geroztik, irakasle, itzultzaile,
interpretari eta gidoilari lanetan aritu da (ETBko Sautrela
literatura saioan besteak beste).
Bi aldiz jaso du Becerro de Bengoa saiakera-saria. Lehena,
1995ean eman zioten Jon Elordirekin batera idatzi zuen Lizardi
eta erotismoa saiakeragatik. Bigarrena, 2000 urtean Zazpi
saio, zazpi leiho lanarengatik. Lan horretan mendebukaerako
idazleen kezka estetikoez ari da.
Entseguak, ipuinak, poemak eta komikiak atera ditu han-hemenka
eta hainbat letra idatzi musika taldeentzako: Mikel Urdangarin,
Piztiak, TTLT, Bide ertzean, Sagarroi eta beste. Euskaldunon
egunkarian zutabegile da astero. The Balde aldizkarian literatur
kontuetaz arduratzen da. Arabierazko idazle, aborigen, AEBetako
eta Afrika hegoaldeko idazleen testuak itzuli ditu bertan.
Hortik zehar, Raymond Carver, Silvia Plath, Anne Sexton, Manuel
Rivas eta Wislawa Szymborskaren poemak euskaratu ditu, besteak
beste.
Azken lanen artean hiru aipagai: Lehena, Bar Puerto, literatura,
musika eta bideoa batzen zituen ikuskizuna. Egitasmo hori
Josu Eizagirre bideogilea eta Mikel Urdangarin eta Bingen
Mendizabal musikariekin batera burutu zuen. Ikusentzunezkoan
kantak, irudiak, testuak eta benetako jendearen testigantzak
jasotzen ziren, saihesbidea egiteko Ondarroan bota zuten Zaldupe
izeneko auzo zaharra aitzakia hartuz. Gero, diska-liburu gisa
argitatu zen Gaztelupeko Hotsak etxearen eskutik. Bigarren
lana, Ekidazu, Kukubiltxok eta Oskorrik taularaturiko antzezlanaren
gidoia da, Mikel Zarateren ipuin batean oinarritua. Laster
ikusiko du argia liburu gisa. Hirugarrena, Bitartean heldu
eskutik poema-liburua, 2001eko Kritika Saria.
|
